36.

Book of History

٣٦-

كِتَابُ التَّأْرِيخِ

Hazrat Abu Wael farmate hain keh Hazrat Saad bin Abi Waqas apna lashkar le kar Qadisiya pahunche Mere khayal mein hum log saat ya aath hazaar se ziada nahin the jabkeh mushrik dushman saatth hazaar se ziada the Un ke pass hathi bhi the Jab woh maidan mein utre to unhon ne hum se kaha keh wapas chale jao na tumhare pass tadad hai na quwwat hai aur na hi aslaha wapas chale jao Hum ne kaha keh hum wapas nahin jayenge Woh hamare teeron ko dekh kar bhi hanste the aur unhen charkhe se tashbeeh dete the Jab hum ne un ki baat manne aur wapas jane se inkar kar diya to unhon ne kaha keh kisi samajhdaar aadmi ko hamare pass bhejo jo tumhari aamad ke maqsad ko hamare liye wazeh kar de kyunkeh hum to na tum mein koi tadad dekhte hain aur na hi koi quwwat (2) Is par Hazrat Mughira bin Shaaba ne kaha keh mein un ke pass jata hun Hazrat Mughira un ke pass gaye aur jakar Rustam ke sath us ke takht par baith gaye Yeh baat Rustam ko aur us ke sathiyon ko bahut nagawar mehsoos hui Hazrat Mughira ne kaha keh mere yahan baithne se na to meri izzat mein izafa hua hai aur na tumhare badshah ki shan mein koi kami hui hai Rustam ne kaha keh mujhe batao keh tum apne shehar se yahan kyun aaye ho kyunkeh mein tum mein na koi tadad dekhta hun aur na hi quwwat Is par Hazrat Mughira bin Shaaba (Raz) ne farmaya keh hum ek aisi qaum the jo badbakhti aur gumrahi ka shikar thi Allah Ta'ala ne hum mein ek nabi ko bheja jin ki wajah se Allah Ta'ala ne hamein hidayat ata farmaayi Allah Ta'ala ne un ki wajah se hamein rozi bhi ata ki Jo rozi un ki wajah se hamein mili us mein ek aisa ghala tha jis ke bare mein logon ko khayal hai keh woh is sarzameen mein paida hota hai Jab hum ne use khaya aur apne ghar walon ko khilaya to logon ne kaha keh hamare liye us waqt tak koi bhalayi nahin jab tak hum is sarzameen mein jakar is ghale ko na khayen (3) Rustam ne kaha keh phir hum tumhen qatl karenge Hazrat Mughira ne kaha keh agar tum hamein qatl karo ge to hum jannat mein dakhil honge aur agar hum ne tumhen qatl kiya to tum jahannam mein jao ge Larai na hone ki soorat mein tumhen jizya dena hoga Jab Hazrat Mughira ne kaha keh tumhen jizya dena hoga to woh log cheekhne lage aur shadeed ghusse ka izhaar karne lage aur kaha keh tumhari aur hamari sulah nahin hogi Phir Hazrat Mughira ne farmaya keh tum hamari taraf pesh qadmi karte ho ya hum tumhari taraf badhen Rustam ne kaha keh hum tumhari taraf aate hain Pas musalman peeche huye aur un mein se jis ne aage badhna tha aage badha aur musalmanon ne un par hamla kiya unhen qatl kiya aur unhen shikast de di Ravi Hazrat Hussain farmate hain keh un ke badshah Rustam ka ta'aluq Azerbaijan se tha (4) Hazrat Hussain farmate hain keh mein ne apne ek buzurg Ubaid bin Jahsh ko farmate huye suna hai keh hum aadmiyon ki pushton par chal rahe the aur aadmiyon ki pushton par khandaq uboor kar rahe the Unhen kisi hathiyar ne chhua tak nahin tha unhon ne ek doosre ko qatl kiya tha Hamein ek sheeshi mein kuchh kafoor mili hum ne samjha keh yeh namak hai chunancha hum ne gosht pakaya aur is par se chhidka lekin hamein kuchh zayqa mehsoos na hua Hamare pass se ek qamees mein malboos ek eesayi rahib guzra aur us ne kaha keh aye Arab ke log apna khana kharab na karo is sarzameen ke namak mein koi khair nahin kya mein tumhen is ke badle yeh qamees de dun Chunancha ne hum ne woh sheeshi ek qamees ke badle use de di aur woh qamees apne ek sathi ko di aur woh us ne pehen li Hum use ghumane lage aur khush hone lage Baad mein hamein maloom hua keh is qamees ki qeemat do dirham hai (5) Ubaid bin Jahsh nami buzurg farmate hain keh mein ne ek aise aadmi ko dekha jis ne do kangan pehen rakhe the us ka hathiyar ek qabar mein tha Mein ne use bahar nikalne ko kaha woh bahar nikla na us ne hum se baat ki aur na hum ne us se baat ki aur hum ne use qatl kar diya Phir hum ne unhen shikast de di aur woh Furaat chale gaye Hum ne unhen talaash kiya aur shikast khurda ho kar Suraa tak chale gaye Phir hum ne unhen talaash kiya unhen shikast di to woh saraat chale gaye phir hum ne unhen talaash kiya unhen shikast di to woh Madain chale gaye Phir hum Koosa naam jaga thehre wahan mushrikeen ke musallah jangju the Musalmanon ke ghor sawaron ne un se jung ki to woh shikast kha kar Madain chale gaye (6) Phir musalman chale aur daryaaye Dajla ke kinare jakar padav dala Phir musalmanon ki ek jamaat ne Kalwadhi ya is ki nichli janib se Madain ko uboor kiya aur kafiron ka muhasira kar liya yahan tak keh un ke pass khane ke liye un ke kutton aur billiyon ke siwa kuchh na bacha Phir ek raat ke baad woh Jalula aaye aur Hazrat Saad (Raz) logon ko le kar chale aur Hazrat Hashim bin Utba logon ke aage the Is ke baad Allah ne dushmanon ko halak kar diya aur un mein se kuchh log Nahawand chale gaye Hazrat Abu Wael farmate hain keh jab mushrikeen ko Jalula mein shikast ho gayi to woh Nahawand chale gaye Hazrat Umar (Raz) ne Kufa walon par Hazrat Huzaifa bin Yaman ko aur Basra walon par Mujashia bin Masood Salmi ko hakim bana diya Phir Hazrat Amro bin Madi Karb un ke pass aaye aur kaha keh mujhe mere ghore jaisa ghora aur mere hathiyar jaisa hathiyar do Unhon ne kaha keh haan mein tumhen apne maal mein se deta hun Phir Amro bin Madi Karb ne un se kaha keh hum ne tumhari hajo ki lekin hum ne tumhen khamosh na karaya hum ne tum se qital kiya lekin hum ne tumhen buzdil na kiya aur hum ne tum se sawal kiya lekin hum ne tumhen bakheel na banaya (7) Hazrat Hussain farmate hain keh Hazrat Noman bin Muqrin Kiskar ke hakim the Unhon ne Hazrat Umar ko khat likha jis mein unhon ne tahreer kiya keh aye Amir-ul-Momineen meri aur Kiskar ki misaal is naujawan ki si hai jo kisi faahisha aurat ke pass ho aur woh aurat us ke liye zeb o zeenat ikhtiyar kare aur khushbu lagaye mein aap ko qasam deta hun keh aap mujhe Kiskar se mazul kar ke kisi lashkar mein bhej den Hazrat Umar (Raz) ne unhen jawab mein farmaya keh tum Nahawand chale jao aur tum wahan ke lashkar ke ameer ho (8) Hazrat Noman bin Muqrin wahan fauj se ja mile aur mushrikeen se larai ki aur woh pehle shaheed sabit huye Phir Suwaid bin Muqrin ne jhanda thama aur Allah Pak ne un ke hath par fatah ata farmaayi aur mushrikeen ko halak farma diya aur is ke baad se un ki koi jamaat sar na utha saki Har shehar wale apne dushmanon aur un ke shehron ki taraf jaya karte the (9) Hazrat Hussain farmate hain keh jab mushrikeen ko Madain mein shikast ho gayi to woh Jalula mein musalmanon ke sath mil gaye the Phir woh wapas aaye aur Hazrat Ammar bin Yasir ko bhej diya Woh chale aur Madain pahunche aur irada kiya keh logon ko wahan utaaren Wahan logon ki sehat kharab ho gayi aur unhon ne is ko napasand kiya Hazrat Umar (Raz) ko yeh baat maloom hui keh logon ne is jaga ko pasand nahin kiya to aap ne sawal kiya keh kya unt wahan theek rehte hain Aap ko bataya gaya keh nahin kyunkeh wahan machchhar bahut hain Hazrat Umar (Raz) ne farmaya keh Arab is jaga theek nahin rehte jahan unt theek na rehte hon Phir log wahan se wapas aagaye Phir Hazrat Saad (Raz) ek eesayi rahib ko mile us ne kaha keh mein tumhen ek aisi sarzameen ke bare mein batata hun jo nasheb se buland hai tele se kam tar hai Is ki aab o hawa mo'tadil hai aur woh tamam makhlooq ke liye umda hai aur woh Hira aur Furaat ke darmiyaan ki sarzameen hai