53.

The Book of Paradise, its Description, its Bounties and its Inhabitants

٥٣-

كتاب الجنة وصفة نعيمها وأهلها

Imam Masrooq bayan karte hain, hum Hadhrat Abdullah Bin Mas'ud (Razi Allahu Anhu) ke paas baithe hue the aur woh hamare darmiyan (apne bistar ya bichone par) lete hue the to ek shakhs aaya aur kehne laga: Abu Abdur Rahman! Abwab Kinda (Koofa ka ek mohalla) mein ek qissa go (wa'iz) aaya hua hai, woh wa'z kar raha hai aur yeh kehta hai ke dhuen wali (Allah ki) nishani aayegi aur (yeh dhuan) kafirou ki ruhain qabz kar lega aur mominon ko yeh zukam jaisi kaifiyat se dochar karega. Hadhrat Abdullah (Bin Mas'ud (Razi Allahu Anhu)) ne kaha aur woh gusse ke alam mein uth kar baith gaye, Logo! Allah se daro, tum mein se jo shakhs koi cheez janta ho, woh itni hi bayan kare jitni janta ho aur jo nahi janta, woh kahe: Allah ziyada janne wala hai. Beshak woh (Allah Ta'ala) tum mein se us ko (bhi) ziyada janne wala hai. Jo is baat ke bare mein jo woh nahi janta, yeh kehta hai: Allah ziyada janne wala hai. Allah (Azza Wa Jall) ne apne Nabi Kareem (Sallallahu Alaihi Wa Sallam) se farmaya; "Keh dijiye: Main tum se koi ajr nahi mangta aur na hi banawat karne walou mein se hoon." (Surah Saad: 86) Rasul Allah (Sallallahu Alaihi Wa Sallam) ne jab logon ki Deen se rogardani dekhi to aap ne (dua karte hue) farmaya: "Aye Allah! (un par) Yusuf (Alaihis Salam) ke saat salon jaise saat saal (bhej de)." (Abdullah Bin Mas'ud (Razi Allahu Anhu) ne) kaha: To unhen (qahet ke) ek saal ne aa liya jis ne har cheez ka safaya karaya, yahan tak ke un (mushrik) logon ne bhook se chamde aur murdar tak khaye. Un mein se koi shakhs asman ki taraf dekhta to usay dhuen ke jaisi ek cheez chhayi hui nazar aati. Chunanche Abu Sufyan Rasul Allah (Sallallahu Alaihi Wa Sallam) ki khidmat mein aaya aur kaha: Aye Muhammad (Sallallahu Alaihi Wa Sallam) aap aaye hain, Allah ki ita'at aur sila rahmi ka hukum dete hain, aap ki qaum (qahet aur bhook se) halak ho rahi hai. Un ke liye Allah se dua karein. Allah (Azza Wa Jall) ne farmaya: "Aap us din ka intezar karein jab asman ek nazar aane wale dhuen ko le aayega. Jo logon par chha jayega, jo almnak azab hoga, (kahenge) Aye hamare Rabb! hum se is azab ko door kar de, hum Iman le aayenge, is waqt unhen naseehat kahan kargar hogi, halanke un ke paas Rasul e Mubeen (khol kar bayan karne wala) aa chuka hai, phir unhon ne us se munh moda aur kehne lage, yeh to sikhaya padhaya deewana hai. "Hum thodi der azab hata denge, magar tum phir wahi karoge jo pehle karte rahe." (Dukhan Ayat Number 10 ta 15) Hadhrat Abdullah (Razi Allahu Anhu) ne kaha, kya Akhirat ka azab hata diya jayega? Jis din hum sakht giraft karenge, phir inteqam le kar rahenge." (Ayat Number 16). So pakde se murad, Badr ka din hai, dhuen wali nishani guzar chuki hai, is tarah pakad, lizam (qatl o qaid) o Rum ki fatah guzar chuki hai."